Si Adaw Nga Mahilig Maglagaw

Abstract

Si Adaw ang bata nga babaye nga mahilig maglagaw.  Nasadyahan gid siya nga mamasyar sa lain-lain nga lugar.  Ang iya gid paborito nga kadtuan amo ang uma kung sa diin nagaistar ang iya Lolo kag Lola.

Isa ka adlaw sang Sabado, naglisensya si Adaw sa iya nanay.  “ Nay pwede bala ako makakadto sa Lumbia, sa Uma kanday Lolo kag Lola?” pamangkot ni Adaw.. “ Sige anak pero kinahanglan magpaupod ikaw kay tatay mo, kag maghalong gid.   Indi gid magkalipat magsuksok sang imo facemask kag maghugas permi sang imo kamot.  Pahanumdom ni Nanay..“Yehey, sige nay himuon ko gid ina, Salamat nanay”.

Naglakat na ang mag-amay pakadto sa uma.  Pag-abot didto, naghugas si Adaw sang iya kamot kag dasig nga nagbisa kay lolo kag lola.  Dayon nagwa si Adaw sa balay.  Nakita niya ang puno sang Paho, Santol kag Bayabas nga nagapung-pong ang bunga. Dali-dali nga nagsaka si Adaw sa puno,nagpamuksi sang bunga kag nagkaon.

Tuman gid ang kalipay  ni Adaw samtang yara sa ibabaw sang puno.  Sunod nakita ni Adaw ang bukid sa luyo sang balay ni lolo kag lola.  Dasig nga nagpanaog si Adaw sa ibabaw sang puno, nagkuha sang paklang sang lubi kag nagpadulhoy sa bukid.  Nagpaligo man siya sa suba. 

Kasadya gid ang nabatyagan ni Adaw samtang yara sa uma.  “ Tay mabalik naman kita diri sunod semana ha?” Magasakay naman ako sa karosa ni lolo, magakaon sang manamit nga alupe nga luto ni lola, kag magaham-pang sa akon mga abyan.  Hambal ni Adaw.  “Sige anak basta maghalong gid, kag panumdumon gid ang bilin ni nanay.  Salamat tay..

 Kag malipayon nga nagpauli ang mag-amay sa ila balay.